Daartol : Sammba Jaatara e Yero Pullo

Ñalnde mawbaare 13 Jolal hitaande 2018
Daartol Sammba jaatara e yero Pullo.

Daartol hakkunde ɓee sehilaaɓe ɗiɗo (2) : Sammba jaatara e Yero Pullo, ko ɓe sehilaaɓe tigi-rigi saɗne.

Waɗiino sahaa gooto Sammba jaatara waynii Yero pullo ena yiɗi waɗde ɗanngal nde tawnoo o tawaani jawdi, oon saha sammba ɓuri mo jawdi sibu omo tawi jawdi, sibu baaba makko ko jom nayi beyi he baali, baaba makko ko galo wonno nde baaba makko saŋkii, o heɓɓitii jawdi ndi, nde tawno ko kaŋko ko o gooto o alaa ɓe o jiidi saka o ronondira he mum'en, ɗuum saabi ko jom jawdi saɗne. Eɗen njokka daarol men tawde janngoowo o fuɗɗii ma romminaade : Yero pullo wayniima Sammba Jaatara, o naati e ladde omo acci dewbo makko ina sowii. Nde o yahata nde tawii omo woppi ɓiɗɗo gorko jahroowo he duuɓi ɗiɗi (2) oon ɓiɗɗo o inniri ɗum ko Sammba jaatara mo ngannduɗaa ko sehil makko no feewi ndiyam siyata hakkunde maɓɓe (makɓe) “O yehii ko ena tolnoo he duuɓi sappo o araani, o noddata o winndata, ni dewbo o jaaki no feewi!.

O accunoo dewbo o ko cowiiɗo haa oon jibinii dañii ɓiɗɗo dewbo heɓii duuɓi mum sappo, ni dewbo o felliti diisnaade haŋkadi he sehil mum gorko makko, hono Yero pullo; ni Yero kañum e hoyre mum felliti yiyiloyaade sehil mum hono Sammba jaatara kaŋko ne o yehii haa wonii duuɓi ɗiɗi o nanaaka o yiyaaka; haa woni saha gooto o arti saanga futuro o jaɓɓa ngam yaakoraade hayso o addaani sehil makko o, ina joorta o nanii dille mum.

3 : gartal Sammba J.

Yero Pullo artii yiyloyaade sehil mum, kono GENO hoddiri ɓe njiyndiiraani, kadi o nanaani dille makko he nder duuɓi ɗiɗi ɗi o waɗi njiilaw ɗi fof,  dewbo sammba jaatara felliti haŋkadi ƴeewde feere, kono Yero yiɗaano dewbo o yalta juuɗe makɓe sibu aɓe nganndi ko o dewbo baɗɗo faayiida aɓe njogii he makko hoolaare; dewbo o wiyetee ko kummba Jaatara o jooftinaa ko he yettoode gorko makko. Waɗi sahaa gooto Sammba jaatara wiyi ina warto sibu dewbo sehil mum ena jogori yahde alaa ko waawi heen.

4 : Kummba Jaatara.

Kummba Jaatara, ko dewbo jooɗɗo wonno saɗne, jontaaɗo keewɗo nehdi; teskaama he makko kaaraysireraagal mawngal kadi ko nuunɗu'ɗo dokko pamaro sawtawuuji keewɗo ko moosata, dardaro keewɗo pinal, o sifortaake ɓutto, o sifortaake cewɗo. O wonaa ɓaleejo kurum o wonaa boɗeejo coyi (faatu ma keneejo).

5 : Ɓataake Sammba J.

Waɗi sahaa gooto Kummba Jaatara dañi koɗo, o bismii koɗo o, aɓe njeewta haa koɗo o wiyi mi meeɗi wondude he musiɗɗo gooto o wiyi o jeyaa ko he ngo wuro, ɗoon tan dewbo o diwi girñitii wiyi no wiyetee koɗo o heɓɓitii wiyi mo o wiyetee ko Sammba jaatara, kono saha mo'min njiyndirta nde tawii o resii o waɗii galle; ko ena tolnoo he duuɓi sappo he joyi 15), ni Kummba wiyi ina woodi “koɗo wiyi no yiyri'mo ni ina anndi wonaa mehre, ina anndi wonaa he sago makko o woni, waɗi saha dewbo o yehi to ceerno gooto baɗoowo ƴeewngal ceerno o ƴeewani mo, ceerno o wiyi mo gorko ma o ko baɗaaɗo woto o artu e wuro ngo, kaŋko baɗɗo o, o faynditii heen ko ɓamtude ma, jooɗo ɗoo e balɗe 5 maa wood garɗo ƴamde ma. Kummba Jaatara hooti galle mum'en haa ñalnde timmata balɗe joyi nde woodi suka gorko gooto jeyaaɗo he nder wuro ngo ari wiyi yiɗi ko ndaartirde mo ƴamal ni o anndi ko o gorko tigi ceerno o wiyi no.

6 : Yero pullo.

Yero pullo felliti haŋkadi tawde sehil makko yehii, yoo waɗ feere o heɓɓito galle sehil makko o, so wonaa ɗuum galle o jogori ko yande; ale-e-sago so omo heɓɓitoo galle o, ko maa o ɓamta dewbo o, hono Kummba jaatara. Yero Pullo ari haalani Kummba o yiɗi ko ɓamtude mo tawde sammba jaatara yehii haa hannde dille makko nanaaka; ɗoon tan Kummba Jaatara wiyi nani jaɓi sibu ɓurani ɗum jooɗaade tawa o ɓamtaaka. Ɓe kaaldi ɓe nanondiri dewgal sarɗa”, ɓe ndesondiri, weeti subaka yannge dawra : tawii noon dewbo o yehiino to ceerno wuro ngo, ceerno o ittii dewgal ngal.

7 : dewgal.

Ñalnde ɓe ndawri dewgal ngal naange fuɗɗiima feggaade ange jiiɓa mbuuɗu,  hakkunde futuro e geeƴe haa Sammba jaatara naati wuro ngo ena, yiɗi anndude hol ko foti kewde galle mum” o yiyi gooto he yimɓe wuro ngo o laaɓɓndi ɗum hol ko woni galle kaari en oon wiyi mo Kummba jaatara hannde ndammbordu makko dawraal, sibu gorko makko yehii gila komin sukaaɓe min teskittaako ɗum oon saha tawii amin pamɗi kono gorko o haa jooni artaani; jooni noon o heɓii gorko goɗɗo ko hannde woni dewgal ngal; o wiyi mo hol kumanɗo mo wuro ɗo, o wiyi ko suka gooto ena wiyee Yero pullo ko sehil mum jom galle makko, ɗoon ngaanumma jaggi mo, haa no feewi, o felliti haŋkadi yottaade galle. O woni he nder wuro ngo haa timmi balɗe tati, ñalnde timmata balɗe tati nde o acci haa jamma hedde tataɓal jamma o naati galle o, o hoŋki damal haa Yero pullo udditi yiyi mo tan sukki junngo he hunuko wiyi bisimilla ma haa weeta njeewten; “kaŋko Sammba Jaatara wiyi mo sehil am anndu dewbo bonnata cehilaagal men, Yero pullo wiyi Sammba Jaatara mbiɗa anndu ma ka sehil am giɗo am.

8 : hakkunde Sammba Jaatara e Yero pullo.

Gooto e makɓe fof wiyi accirii goɗɗo o dewbo o, sibu cehilaagal hakkunde maɓke ɓuraniɓe dewbo o : jooni hol no ɓe poti waɗde. Sibu Sammba Jaatara seeraano dewbo o, Yero Pullo kañum ne humanaa ma he dewbo o, ɓoggol taƴaani hakkunde makɓe (maɓɓe), tawo : jooni hol no ɓe poti waɗdudee he o dewbo haa gooto he makɓe ɓamta dewbo o, tawa caɗeele ngoodaani laaɓndal he juuɗe mon?

Ngol daarol waɗi ɗum ko musiɗɗo mon giɗo mon sehil mon :
NGENNDIYANKE JOOB
RABAT. MADIINA GUNAAS.
Kala ko ŋakki he daarol ngol, walla ko
Ŋakki heen feewnitaade on paame
Ko he aade o woni, ko miin juumi.
Kala heen ko feewi ko he ballal Allah.
Eɗen ñaagi Allah yoo juul he koohoowo men o Annabi o, Muhammadu s.a.w yoo jam he kisal Allah ngon he makko aamiin.

Yoo Allah hisnu pulaagu, hisna hisnooɓe pulaagu ngu he kuuɓal (Aamiin).