Ciñcirɗe Rabat

Ñalnde Aaɓnde 26 Jolal hitaande 2018
Ina hawri e 18 lewru mawluud hit 1440

CIÑCIRƊE RABAT MADIINA GUNAAS.

1 : T) Ngam sifaade seeɗa he ngo wuro teddungo ngo Ceerno mawɗo siñci he hitaande 1960, ko wuro ɓooyngo.

Teskoɗen kala nde mbiyɗen ceerno Mawɗo anndu njoofiɗen ko : Ceerno Alh Muhammadu saydu BAH yoo kisal Allah won he makko (aamiin). Rabat ko wuro wonngo he taariindi MG, yoga he gure keewɗe ɗe en mbaawata limtude ko wuro ɓooyngo, ko kanngo adii siñceede he Sahdatu Madiina khayri ekn. Rabat ngo hoɗii ko ina tolno he duuɓi 58 ngo yiƴƴi ko he keɓgol Senegaal jeytaare mum, he nguurndam Alh Saydu nuuru taal”. Mo ngannduɗaa jeytaare ngenndi SNGL rewi ko he junngo mum. Eɗen njokka he taarik wuro ngo tawde janngoowo o fuɗɗiima romminaade.

Ceerno mawɗo siñci wuro ngo waɗi heen almuudo mum jannginoowo Alquraana, adii wonde almaami wuro ngo, ko Ceerno Mammadu Jah, caggal nde oon natti (Saŋki), Ceerno Usmaan SIH lomtii tawii ko he yamiroore Ceerno mawɗo”, O lomtii almaami, haa e hitaande 2002 oon ne natti, hawri ko he gardagol Kaliifa tedduɗo o Ceerno Alh Aamadu tijjaani BAH, he hitaande (2004), Ceerno Muusa Iisa SOH lomtii haa hannde ko oon lomti Almaami sahre nde. Rabat ko wuro ngo Ceerno ɓuri teskaade to senngo nanondiral, ko wuro ngo ceerno ɓuri horsinde no feewi, gila he nguurndam Ceerno mawɗo (RTA), to senngo dawi ngesa ceerno rabatnaaɓe ko teskaaɓe, to demal to gaawgol to duggere to coñal, he kala fannu to senngo golle gese ceerno mawɗo (RTA)”. Nde Ceerno mawɗo siñcingo ha gasi o adii ñaamde ɗoon ko njuumri, o duwii o wiyi maa ngo wel hono no ndi njuumri wayi welde nih, seydi Bah.

ADINOOƁE FERDE.

Adinooɓe ferde ɓe, ɓeen mawɓe hannde heewɓe he maɓɓe hannde nguuraani yoo njurumndeeru Allah won he maɓɓe kamɓe he denndaangal maayɓe juulɓe (Aamiin)", Ina teskaa heen galle Abdullaay maabo gise, hannde oon saŋkiima, yoo Allah yurmo yaafo (Aamiin), He galle Haaruuna pullo Jallo yoo yurmeende Allah won he makko (aamiin), he galle Mammadu dawa Jaawo, oon ne saŋkiima yoo yurmeende Allah he makko (Aamiin), he galle Muusa Alassan Jaawo, he Ceerno Usmaan Sih, baɗtunooɗo Almaami ɗiɗaɓo wuro ngo, ɓee fof ina njeyaa he adiiɓe ferde ngam ferande Allah he Nulaaɗo mum (S.A.W), ɓe perani diine lislaam he sunna Nulaaɗo Muhammadu (S.A.W)”, Yoo Allah yurmo yaafo wonande maayɓe ɓe, kamɓe he denndaangal maayɓe juulɓe. En nduwanimaɓe yoo toon won fooftorde maɓɓe (aamiin). Wuurɓe ɓe yoo Allah juutnu nguurndam-meeje maɓɓe waɗda heen kisal he yaajeende (Aamiin).

Rabat.
Wuro ngo, ko wuro jawdi ndariindi nayi, beyi he baali,  ko wuro ranwungo, heewngo lekɗe ñaamateeɗe teeŋti he manngooje. Hitaande 1942 rabat waɗaama Daaka,  oon saatu to wiyeteno daaka rabat haŋki, hannde ko ɗoon wonti madiina khayri”, Ardinoo ngoon wuro ko Ceerno Mammadu manngaan, caggal nde o saŋki ɓiyiiko lomti almamaagal ena wiyee Ceerno Aali manngaan, ɗo nanatnoɗen Daaka rabat ɗo hannde ngoon wuro hoɗti'ɗoon, hakkunde rabat he madiina khayri ko sooynannde e feccere woni ɗoon, ngoon wuro siñcaa ko caggal daaka rabat hitaande 1942.

Rabat
Rabat gure keewɗe ina kuufi ɗum, ko wayno siñcaan ceerno Sammba Jallo, caggal no mbiyɗen nih, madiina khayri, pasuku, caŋku Lama, ena woodi maamel heedi ngo bannge worgo, caggal ɗuum ko MADIINA GUNAAS, heedi ngo bannge rewo hakkunde mum he rabat cooynanɗe (7). Daaka woni ngo bannge sahal; daaka woni dow pasuku, hakkunde mum he pasuku maa won cooynanɗe (3), hakkunde rabat e pasuku ko cooynanɗe (3). Bannge fuɗnaange daaka ena waɗi gure keewɗe haa yotti Sahdatu wuro ceerno Maamuudu sal, ngoon ko wuro wuurngo sibu ngo jiimi ko he takko maayo tokooso ngo, immiingo Gine rewi gulummbu, ngo fayi gammbi, haa bakkel guray sahre demmba guɗum palle.

Rabat
Ngarten he wuro men rabat ɗo mbootu siraaji Joob, lollirɗo Ngenndiyaŋke Joob daasa, he hitaande 1985, caggal birnagol
Ceerno mawɗo duuɓi (5). Rabat taariindi maggo fof ko lekkuule boɓore (boɓori), boode ɗooge cingoole bane, he ceewe (ceewi), ceewe ko lekki ƴumoowi ɗacce, ɗeen ɗacce ena naftoree ko heewi”, Aɓe mbiyatno sa urii ɗacce ɗe he nder suudu sukuña naatata he nder mayru. Ena waɗi lekɗe keewɗe ɗe en mbaawa limtude. Caggal fergo rabat duuɓi ɗiɗi (2), Moodi dalla Joob feri fayi madiina gunaas, ceerno mawɗo joƴƴini mo rabat, oon Moodi dalla jibini Maamuudu he Abdul kariim, Abdul kariim Moodi jbini siraaji Joob, lollirɗo Ngenndiyaŋke Joob. Maamuudu Moodi jibini Sileymaani Joob, lollirɗo Ƴellitaare Joob ekn, daraniiɗo pinal he ɓamtaare, baɗoowo mogiyaŋkaagal to ngenndi farayse.

Banndiraaɓe musiɗɓe tedduɓe, maa en njokkoyi taarik wuro ngo sibu o huuɓaani, gila he sagataaɓe daraniiɓe ɓamtaare wuro ngo, haa e jaale maggo, ngam yarlitaniiɓe ɓamtaare wuro ngo. Kala gannduɗo taarik o, so janngii o yiyi heen ɗo mbaɗɗen njomu bisimilla makko ngam o ɓeydoo famminde en, o waɗta en he laawol ina ɓeydoo en softinde. Ko musiɗɗo mon Ngenndiyaŋke Joob. Rabat. (W1)